السّاحة الدّائريّة
لـ: باسل بديع الزّين
إهداء:
إلى الأستاذ نجيب نعيمه
عربون محبّة وشكر وتقدير
الفصل الأوّل
المكان: مدينة “أ” أو “ب” أو
“…” سيّان.
الزّمان: أيّامنا الحاضرة.
المشهد الأوّل
تفتح السّتارة: المسرح مقفر إلاّ من شخصيّات ثلاث تُجسّد
في الواقع المجتمع البشريّ برمّته. نحن أمام ثلاثة أصدقاء، يجمعهم دومًا المكان
عينه، وهو عبارة عن ساحة دائريّة صغيرة في حضن الطّبيعة جمعهم صغارًا وهوذا يجمعهم
بعد أن أنهوا المرحلة الجامعيّة حيث يسعى كلّ منهم إلى رسم مستقبله انطلاقًا من
شخصيّته.
الأصدقاء: 1 – واضح
2 – طيّب
3 –
مدّاح
واضح: صح انو عمر الصّداقة ما بينقاس بالسّنين،
بس كلمة حقّ ولازم تنقال. يا شباب نحنا كلّ واحد منّا بيحمل شخصيّة مختلفة عن
غيرو، وهيدا أمر طبيعيّ، بس الي بيستحق نوقف عندو انو شخصيّتنا متناقضة كتيير مش
شوي ورغم كلّ هالتناقض جمعتنا بصدق الصّداقة وما فرّقتنا طباعنا المختلفة.
طيّب: حكيك يا واضح بيشيل الهمّ من القلب، الله يديم
هالصحبة، ويا ريت نتعاهد ما يفرّقنا شي بهالحياة لا همّ ولا شغل. نحنا تخرّجنا
السّنة كلّ واحد باختصاص مختلف، بس ضلّت صداقتنا وحدي كأنّا بعدنا بالمدرسة.
مدّاح: خيي طيّب وخيي واضح، انتو كنز، يعني أحيانًا بسأل
حالي أنا من دونكن شو ممكن أعمل بالحياة.
واضح: مدّاح روق عوضعك، صديقي هالحركات مش معنا، ما فيك
تقعد لحظة من دون ما تمدح فلان أو تعظّم فليتان، يا زلمي قدي الي بعرفك بعمري ما
شفتك اخدت موقف نقدي من قضيّة أو كنت صريح مع حدا، مع انك بداخلك بتعرف منيح الصّح
من الغلط بس كلّ الي بيهمّك ما يطلع حدا من أيّا قعدة زعلان.
مدّاح: يا حبيب قلبي يا خيي واضح بشكر صراحتك الي ما في
متلا والي…
واضح: مدّاح احكي شو بدك تقول بلا كتر مدح
مدّاح: قصدي الوضوح والصراحة يا اخواتي بيضروا ما
بينفعوا، النّاس بتحب تسمع الي هيي بدا تسمعو مش الي انت بدك تقولو.
واضح: يعني الكذب خي الصدق المهم نزبط حالنا وأوضاعنا
طيّب: يا شباب بلا هالنقاش جايين نجتمع تنبارك لبعض
عالتّخرّج وعالوظيفة، ماشي الحال خلص كلّ واحد الو شخصيتو المهم ما نزعل من بعض.
واضح: وهيدي كمان مشكلة بشخصيتك خيي طيّب. ما فيك اتضلّ
هالقدّ طيّب، أنت إنسان نقيّ ونضيف وأبيض بس ما بيصير تتعاطى مع كلّ النّاس بطيبة،
يا مخلوق ما في حدا ما أكل حقك، وعطول ماشي الحال ماشي الحال، لأ ما ماشي الحال،
السّاكت عن الحق شيطان أخرس.
طيّب: ماشي الحال
مدّاح: (ينفجر ضاحكًا) هههههههههههههه
واضح: تفضّل بقا
مدّاح: وقف نق شوي خيي واضح، هيدي آخر جلسة قلنا قبل ما
نبلش شغل. يلا خبرنا ليه اخترت مهنة التّعليم.
واضح: بتعرف من صغري بحبّ التّعليم، التّعليم وظيفة
مقدّسة، تخيّل انك تكون مسؤول عن عقول المهندس والطبيب والعالم والشّاعر
والفيزيائي…
مدّاح: حكي عظيم، جد شي بيرفع الراس
واضح: مدّاح ما تستلمني
طيّب: لا والله مدّاح بيحبك من كل قلبو
واضح: طيّب ما تخاف ما رح نتخانق
طيّب: قصدي خلي الجلسة ودية إذا بتحب
واضح: يا خيي انفجر شي مرة عبّر عن رأيك ما تخاف من شي
قول الي بقلبك، خيي قلي حكيك ما معاجبني انتقدني
طيّب: والله ما في منك خيي واضح
مدّاح: (ضاحكًا) ههههههههههههههه
خيي طيب ليه اخترت وظيفة مرشد اجتماعي
طيّب: آخخخخ شو بدي خبرك، نحنا بمجتمع شبابو عاطلين عن
الأمل، الفقر والجوع ما خلو مطرح للطيبة والأخلاق، كترت السرقات، وكتر النهب، لازم
نساعد هالشباب تيطلعوا من الفراغ الي هنّي في، يعني ما بتكفي قعدتون عالقهاوي شرب
وسكر ومراهقة وإجرام تحتّى نحرك حالنا ونحاول نساعدن؟
مدّاح: حكي عظيم يا ريت فيني كون متلك جد أنت سابقنا
بأشواط
واضح: مستحيل، غريب أمرك ما بتعرف تكون صادق حتّى مع صديقك
مدّاح: عطول ظالمني
واضح: لا ظالمك ولا ظالمني، المهم خيي طيب الي عم بتحكي
رائع إذا كنت بدولة بتحترم شعبها وبتأمنلون كل وسائل الحياة الكريمة، بس انت بوطن شبابو
تابع لجهات سياسيّة يعني موظفين عند الزعيم، ومن مصلحة الزعيم يضلو عوضعون تيضل
يتحكم بإرادتون متل ما بدو. ايد وحدي ما بتزقف يا طيب يا حبيبي يعني كل جهدك ما رح
يجيب نتيجة.
طيّب: ماشي الحال منحاول، الله كريم
واضح: بيرجع بيقلي ماشي الحال اصطفل. وانت استاذ مدّاح
انت الوحيد الي ما عرفنا شي عن وظيفتو.
مدّاح: الحكي بيناتنا. الأستاذ مفيد
واضح: مين الأستاذ مفيد؟
مدّاح: مفيد راجح النائب بالبرلمان، بتعرفوا انو ابن عم
بابا اللّزم، زبطنا وضعنا معو، ورح امسك إدارة مكتبو.
طيّب: الله يوفقك، ونشوفك بأعلى المراتب.
واضح: لحظة لحظة، بس الأستاذ مفيد بيختلف بالسّياسة
جذريًّا مع بيّك، وعلى حد علمي ما بيحكو مع بعض من فترة طويلة، وانو عيلتكن انقسمت
وأهلك ما صوّتولوا!!!
طيّب: الأبناء يصلحون ما أفسده الآباء، المهم الصلحة
ماشي الحال
واضح: يحرق… شو قصتك مع كلمة ماشي الحال؟ روق روق
تنفهم الموضوع
مدّاح: واضح كلنا منعرف انو الخلاف السّياسي موقت،
والتحالفات كل يوم ببتغير، الي معك اليوم بكره ضدك، والي ضدك اليوم بكره معك.
واضح: والمبدأ؟
مدّاح: بالسياسة ما في مبدأ وأنت أدرى الناس بهالحكي.
طيّب: المهم تتصالحوا
مداح: يقبرني الي بيفهم
واضح: تركني منو. المهم بيك عرف؟
مداح: عرف وخرب الدني، وشكلو رح يدشرني من البيت. مش
أزمة بيزعل اليوم بيرضى بكره.
طيب: المهم ما تترك بيك زعلان.
مداح: بيرضى بيرضى ما تخاف.
واضح: بتعرف مداح، لو اختيارك نابع من إيمانك بمبدأ ما
كنت زعلت، بس المشكلة انو يمكن بلحظة تقلب على مفيد اذا لقيت مصلحتك بمطرح تاني.
مداح: لوقتا فرج
واضح: لوين قايم؟
طيب: يا زلمي وين رايح؟
مداح: لازم شوف سلمى. وانت يا واضح ما كتير تقسى عثريا
ما ضروري تكون هالقد صارم. وطيب شدلي حالك شوي، مش كل شي بتقولوا نهى بتقلا ماشي
الحال.
طيب: مشاي الحال المهم ما تزعل.
مداح وواضح يغرقان في ضحك عميق…
المشهد الثّاني
(سلمى ومدّاح)
سلمى: ما بعرف ما كتير مرتاحة لقرارك.
مداح: شوية زعل وبيخلصوا، بس يشوفني بيي عم بكبر أكيد رح
يعرف انو مصلحتو ما يزعلني.
سلمى: مصلحة بيك ما يزعلك؟ أو واجبك ما تزعلو؟
مداح: نجاحي ما بيزعلو انا واثق. بعدين اذا بدو يضل
زعلان كم كلمة حلوي بيمشّوا الحال متل ما بيقول خيي طيب، وحياتك مش أزمة.
سلمى: مداح، انت جد بتحبني؟
مداح: معقول عم بتسألي هالسؤال ليه في متل حنانك
وجمالك…
سلمى: مداح أنا أكتر وحدي بتفهمك. هالحركات ما تعملون
معي.
مداح: أيا حركات. طب وحياة معزتك و…
سلمى: مداح شو مصلحتك معي؟
مداح: سلمى هيدا حكي خطييير
سلمى: بيي شبكة علاقات كبيرة بعرف، وعرفك عاكتر من
شخصية، وواعدك يعرفك عناس كبار بالبلد، يعني انا مطمني انو من هون لسنتين ما بتحب
حدا غيري، بس اذا لقيت مصلحتك مع بي بنت تانيي او خي بنت تانية شو بيضمنلي اضلك
معي وما تشوف مصلحتك مع غيري؟
مداح: سلمى حياتي كتير عم بتسيئي الظن فيني معقول اتشكي
بحبي الك؟
سلمى: بكون غبية اذا ما بشك.
مداح: هيدا حكي خطير.
سلمى: والأخطر حكيك مع سعاد.
مداح: مين سعاد؟
سلمى: مين سعاد؟ هلأ بطلت تعرف مين سعاد؟ سعاد صديقتي أو
المفروض إنّا صديقتي، حرام كتير تلبكت بس حكيتا امبارح وأكيد قالتلك إنّا كنّا سوا
مداح: ليه نيتك سيئة، ما معقول انتِ، في شغل بيني وبينا
هيدا كل الموضوع.
سلمى: شغل شو مداح شغل شو فسرلي؟
مداح: خلص شغل. ما ضروري تعرفي كل شي
سلمى: مداح يا بتفسرلي شو عم بيصير يا بفل وكل شي
بيناتنا بينتهي.
مداح: آخخخ. من الآخر. خيا لسعاد مدير مكتب وزير الشباب،
وبدي ربط مع الوزير، وسعاد عم بترتبلي موعد مع خيا.
سلمى: ما معقول مداح ما في حدا ما بستغلوا، ما في عندك
علاقة صافية ونقية وإنسانية. يا خوفي سعاد تصير البديل، ما بتعرف، يمكن تأمنلك
مصلحة أكتر.
مداح: سعاد ما تحكي هيك بترجاك بتعرفي قدي بحبك.
سلمى: بسأل حالي أحيانًا ليه ما أخدت شي من طيبة الطيب
ومن وضوح الواضح مع انون اعز اصدقاءك لحد هلأ ما بعرف لبعدين.
مداح: ههه. واحد ترك الدني وراح يشتغل مرشد اجتماعي
تيساعد الفقرا والمعترين، والتاني مصدق انو التعليم مهنة سامية ومقدسة قال شو قادر
يصنع من الجيل الحالي جيل مثقف وواعي ومش طائفي، أهلييين.
سلمى: مداح. جد صرت خاف منك. الي ما الو خير بأهلو
ورفقاتو ما ممكن يكون وفي لحبيبتو إذا بعدا حبيبتو. بالإذن.
مداح: جلسة رومنسية قلبت محاكمة كأنو ما بيكفيني الواضح
وقرفو
سلمى: قرفو. خير. منحكي مداح منحي. (تخرج سلمى)
مداح: سلمى صارت وجعة راس. حدا بيجيب الدب عكرمو. ( ينظر
في ساعته) منيح الي فلت لازم لحق اوصل تشوف سعاد، كانت نستني الهدية.
المشهد الثالث
(مدّاح وسعاد)
سعاد: هدية كتيير غالية ما فيني اقبلا.
مداح: الغالي بدو غالي، بعدين الغالي بيرخصلك.
سعاد: بيرخصلي أو بيرخص لخيي.
مداح: لأ لأ ما تاخدي عني فكرة سيئة. جد زعلت.
سعاد: مداح عن جد بتحبني أو لأنو الك مصلحة مع خيي عم
بتتقرب مني.
مداح: هوايتك بس تزعليني؟ خلينا نروح كل واحد عبيتو
أزبط.
سعاد: يعني عن جد بتحبني؟
مداح: كيف بدك اثبتلك؟
سعاد: تصارح سلمى بالحقيقة.
مداح: قلتلك القصة قصة وقت مش أكتر.
سعاد: بعتقد سنة ونص وقت كافي؟ أو بعد بدك وقت؟
مداح: حسب.
سعاد: عفوًا؟
مداح: قصدي شو صار مع خيك؟
سعاد: يعني تركتك لسعاد مرتبطة بخيي.
مداح: أعوذ بالله أنا عم بحاول غير الموضوع.
سعاد: مداح من الآخر. موعدك مع الوزير الأسبوع الجايية.
مداح: فرجت.
سعاد: اختار الموعد أو سلمى.
مداح: انت الي عندي بالدني.
سعاد: بيهمني تكون صارحت سلمى بالحقيقة أو صدقني بضغط
عخيي يلغي الموعد.
مداح: اعتبري صار…
سعاد: أكييد؟
مداح: شي مرة خذلتك؟
سعاد: المهم هالمرة ما تخذلني.
مداح: عطيني يومين وبتكون كل الأمور منتهية.
سعاد: تنشوف.
(تخرج سعاد)
مداح: علقنا. خليني شوف مصلحتي وين وبعدين الي بدو يصير
يصير.
المشهد الرابع
(واضح وثريا)
ثريا: ما ضروري تكون هالقد فج.
واضح: الوضوح مش فجاجة.
ثريا: أنت أستاذ ثانوي شو إلك علاقة بالأشيا الإدارية؟
ما صرلك أسبوعين بالمدرسة وصرت ماضي عانذارين انو شي ومنو؟
واضح: تلميذ عم بيدخن ما لازم نقلوا شي لانو أهلوا
بيعرفوا انو بيدخن هيدا منطق؟
ثريا: واحد مربي دقنو والتاني تعبان فيا انت شو الك
علاقة؟
واضح: ثريا: نحنا تابعين لوزارة التربية والتعليم. يعني
التربية قبل التعليم.
ثريا: طيب هيدي فهمناها. شو الك علاقة اذا تلميذ سقط
بامتحان الدّخول والإدارة نجحتوا؟
واضح: نحنا المعيار. اجتمعنا كأستاذة ولقينا انو
هالتلميذ ما بينفع يكون بصف البكالوريا.
ثريا: وشو صار بعدين؟
(صمت)
ثريا: مبين سكتت؟ كل الأستاذة قالوا للمدير القرار قرارك
الا انت بدك تعمل من الحبة قبة.
واضح: وين بيكون معيار النزاهة؟
ثريا: واضح بستغرب رغم كل هالسنين ما أخدت شي من مداح.
واضح: ثريا هيدي إهانة. بدك كون إنسان مصلحجي فتش عن
مصلحتي واركض وراها؟
ثريا: اذا هيك شايف صديقك ليه ما بتتخلى عنو؟
واضح: لأنو صديقي
ثريا: يعني في استثناءات
واضح: اذا مداح صديقي ما معناها كون متلو وعكل حال انا
عطول بنتقدوا
ثريا: بحس صعب نكمل بهالطريقة
واضح: ثريا أنا ما بلزم حدا يضل معي بدك اتفلي فلي
ثريا: شكرًا. يعني عن جد متمسك فيني وبقوة.
واضح: هيدا رد عحكيك.
ثريا: هيدي ردات فعلك الي بكرها. لو فكرت بحكيي منيح ما
كنت قلت هيك.
واضح: حكيك واضح.
ثريا: واضح انك ما عم بتفهم حكيي يا واضح.
واضح: فسري!!
ثريا: صعب نكمل مشوارنا ، لانو ما حدا رح يوظفك وأنت
حامل هالعقلية. يعني مستقبلنا مجهول.
واضح: مجهول مجهول المهم مبادئي
ثريا: مين قرب صوب مبادئك؟ لازم تعرف انو في أشيا أكبر
منك ومني، دخلك مين نصّبك حارس عالمجتمع والتربية؟ فوت اعطي ساعاتك وفل.
واضح: ثريا عم بنصدم فيك يوم بعد يوم.
ثريا: واضح بدك كون صريحة؟
واضح: بتعرفي ما بحب الا الصراحة
ثريا: انا ما فيني ابني مستقبلي عمجهول
واضح: وأنا ما فيني كون غير أنا
ثريا: هيك عم بتقتل حبنا
واضح: أنتِ قتلتي بس طلبت مني غير شخصيتي
ثريا: أنا ما عم بقول تغير شخصيتك بس عالأقل خود شي من
مداح
واضح: وأنا ما بعرف كون الا واضح
ثريا: الخلاصة؟
واضح: يا بتقبليني متل ما أنا يا كل واحد بيروح من طريق
ثريا: بدي ياك بس تغير شوي كرامتي
واضح:وأنا ما بعرف غير حالي كرامة حدا
ثريا: هيك عم يتنعي قصة حب عمرا خمس سنين
واضح: بيعز عليي بس…
ثريا: كل واحد منا عندو بس خاصة في
واضح: هلأ أحسن من بعدين
ثريا: خلينا ناخد فترة استراحة ونضل اصدقاء ما بتعرف
الايام
واضح: ثريا بلا ما نضحك عبعض، حبنا ولد ميت، لا أنا رح
كون مداح ولا أنتِ رح تتقبلي شخصية واضح، والصداقة والحب ما بيجتمعوا بقلب واحد.
ثريا: كلمة أخيرة.
واضح: بتمنالك السعادة مع غيري.
ثريا: بهالسهولة
واضح: بهالصعوبة. بس جد هلأ أحسن من بعدين
(تخرج ثريا باكية ويكتفي واضح بالصمت)
المشهد الخامس
(طيب ونهى)
نهى: والنّعم من هيك قرار.
طيّب: ماشي الحال.
نهى: يهههه معقول؟ كل شي ماشي الحال؟ لأ ما ماشي الحال
طيب: 200 دولار بالناقص شو المشكلة
نهى: أنت وقعت عقد بألف دولار بالشهر، برمشة عين صاروا
800 كيف هالحكي؟
طيب: يمكن الجماعة عندن ظروف، كتر خير الله عم نشتغل
بعدنا أحسن من غيرنا.
نهى: يسلملي القنوع. دخلك من وين جايب هالقناعة كلها؟
طيب: نهى الحياة بدا تضحيات، في غيرنا كتير ناس عم
بيشتهوا اللقمة، خلينا نشكر الله عالنعمة الي نحنا فيا…
نهى: يسرقوك وينهبوك ونشكر الله عالنعمة؟ معقول؟
طيب: ماشي الحال المهم ما يصير زعل
نهى: بيرجع بيقلي ماشي الحال. طيب اذا هالقد معلق
برفقاتك ليه ما أخدت شي من مداح أو على الأقل من صراحة واضح.
طيب: واضح فج كتيير ما هيك بيتعامل الإنسان، ومداح بيفتش
بس عمصلحتو. المهم ما تزعلي كل شي بينحل.
نهى: بتعرف أكتر شي بيزعلني منك شو هوي؟
طيب: ما بقبل تزعلي مني، قليلي شو مزعلك وأنا تحت أمرك.
نهى: الي بيزعلني منك انو كل شي تحت أمري
طيب: ما فهمت؟
نهى: طيبتك بتزعلني. طيب كل بنت بتحلم بفارس أحلام
يعاملا بأحسن طريقة ويحترما، بس كمان فارس الأحلام لازم تكون كلمتو كلمة: بيقرر
بالمواقف الصعبة ووقت الي بيكون واثق من قرارو ورأيو ما بيسمح لحدا يأثر في،
ونحنا، نحنا صرنا 4 سنين سوا، أنا الي بقرر، بزعل عأمور تافهة وبتصالحني، بصرخ
بوجك بتهديني، بعصب بتتقبلني، بغلط بحقك بتراضيني. طيب ما تزعل مني بس بعمري ما
حسيت بوهرتك وسلطتك وهيبتك.
طيب: ماشي الحال، المهم انضل متصالحين والأمور زابطا
نهى: مستحيل. جد مستحيل. طيب بتعتقد فينا نكمل هيك؟
طيب: ما فهمت؟
نهى: طيب … طيب… بخاف ما احترمك كفاية.
طيب: لأ لأ هيدا حكي انفعال بعد شوي بتروقي وكل شي بينحل
ماشي الحال
نهى: لأ مش معقول، جد مش معقول، طيّب ما بتعرف تنفعل؟
طيّب: لشو الانفعال كلو بينحل، ليه مكبري الأمور.
نهى: كل الي قلتلك ياه ما أثّر فيك ما حرّك عندك حس
الغضب؟
طيّب: قلتلك انتِ معصّبي شوي وبيمشي الحال.
نهى: طيّب سماع منيح شو رح قلك. أنت إنسان من طينة غير
طينة كل البشر، انفعالك بالأشيا محدود، قنوع أكثر من القناعة نفسها، بسيط متل طفل
بعدو بمهدو. بعمرك ما بتقيس حالك بالأحسن دايمًا بتقيس حالك بالأسوأ وشايف الدني
مجموعة هموم ويأس ووجع قلب، وتكون صريحة معك نحنا ما مننفع نكون سوا، بفهم يكون في
فوارق بين الشخصيات، بس تكون هالقد متناقضة بظن مستحيل تتعايش مع بعضا.
طيّب: ياما في شخصيات متناقضة وناس عايشين بأوضاع
مأساويّة وقادرين يحكموا العقل باختلاف شخصياتن وماشي الحال.
نهى: إذا بضل ساعة معك بعد يمكن انفلج، مش يمكن أكيد رح
انفلج.
طيّب: نهى طولي بالك ما بدا هالقد.
نهى: ما تزعل مني طيب بس كل واحد منا لازم يروح بطريق.
طيب: يعني ما رح كون أوّل إنسان بتتركوا حبيبتو ماشي
الحال شو بعمل.
نهى: طيب خلص طفح الكيل رجاء لا بقا بدي شوفك ولا تشوفني
فتش عن مستقبلك عمول الي بيريحك بس خلص. (تخرج مسرعة)
يبقى طيّب وحيدًا
طيّب: كلو خير كلو خير ماشي الحال.
الفصل الثّاني
المشهد الأوّل
( سلمى ومدّاح)
سلمى: خلصت مصلحتك معي وصار لازم تشوف مصلحتك بمطرح تاني
مدّاح: أنتِ نور عيوني بس أنا واثق انك بستاهلي شخص أفضل
مني وأحسن مني، أنا أنا…
سلمى: أنت كذاب كبير. كان لازم أعرف إنو المصلحة الي
جمعتك فيني رح يجي يوم وتفرقك عني.
مدّاح: أبدًا أبدًا أنتِ…
سلمى: خلص بقا خلص، شو مفكرني عميا، ما عارفي بلقاءات
اليومية مع الست سعاد، ما عارفي انو موعدك مع الوزير قرّب. بس خسارة، خسارة كل
الحب الي حبيتك ياه، كان عندي امل انو رفقاتك ممكن يغيروك، على الأقل ممكن يأثرو
عليك، بس طلع أمل أقسى من اليأس، بتعرف انو ممكن إإذيك، عشان هيك عم تتذلل وتحاول
تطلع مني بأقل ضرر ممكن، بس ما تخاف ما رح إإذيك، بتعرف ليه؟ لأنو شخص متلك خسارة
الأذية في.
(تخرج سلمى)
طيّب: أووووووف هيدا هم خلص. المهم نخلص موضوعنا مع
الوزير، ونشوف شو بدنا نعمل مع سعاد، سعاد مش سهلة ممكن تقلب الطاولة عراسي.
المشهد الثاني
(مدّاح وسعاد)
مدّاح: وعدتك ووفيت بوعدي.
سعاد: ليك مدّاح بعرف انو الي عملتوا يمكن ما يكون محبة
فيني بس
مدّاح: ما تقولي هيك أنا ضحيت كرمالك أنتِ نور عيوني
سعاد: مداح روق روق، مش عليي هالحركات، الي بيجمعنا المصلحة،
أنا واثقة إنك رح تكبر وأنا عم بفتحلك البواب لأنو شخصيتك بهيك بلد بتخليك تكبر،
بس كون أكيد ما رح اسمحلك تكبر وحدك، انا معك تنكبر سوا وبعدين بدك تفل فل، الي
بيناتنا بيزنيس.
مدّاح: والحب والمشاعر النبيلة
سعاد: يا نوسك، ليك عم برجف جد رح أبكي، واو حكيك شو أثر
فيي. مداح الي ببيع بيو وحبيبتو عند أول مفرق بيبيع الدني كلا كرمال مصلحتو، خلينا
نكون واضحين.
مدّاح: بأمرك.
سعاد: وهيدي الكلمة بلاها. بأمرك لوقت وبعدين بيصير كل
شيء بأمرك. “علمتني الحياة أن أوفى أصدقائي ظلي”. فحاجة نكذب عبعض.
مدّاح: طب بالنسبة للموعد؟
سعاد: ما تخاف. بكره الوزير ناطرك بمكتبو الساعة 12.
المهم ما كتيير تتزلف، وعروف شو بدك بالضبط، ما تنسى أنت مدير مكتب النائب مفيد
الراجح، يعني تربيطك مع الوزير بيطلب انو يوثق فيك شوي، شوي يا مداح وكتر التزلف
بيخسر. بشوفك بكرا.
مداح: انت رايحة كمان؟
سعاد: قلتلك: منكبر سوا أو بتخسر وحدك. سلام (تخرج)
مداح: سلام. بيجي وقت ومنلاقيلا تصريفة. خليني نسق أموري
وأعرف شو بدي أحكي بكره.
المشهد الثالث
(مكتب الوزير)
الوزير: (يتكلم على الهاتف): ماشي حضرلي الوراق
القانونية وخلينا ندرس الموضوع بجدية بس عطيني وقت هيك مشروع ما فيني افصل في بين
ليلة وضحاها.
مع السلامة مع السلامة.
أهلا بالأستاذ مداح. خبرني مدير مكتبي إنو طالب لقائي
بمسألة مهمة.
مداح: يعني أول شي بشكر سعة صدرك انك استقبلتني وكلنا
منعرف مشاغلك وكيف شايل البلد عكتافك و…
الوزير: تفضل أستاذ مداح استفيد من الوقت.
مداح: حضرة الوزير بتعرف اني مدير مكتب النائب مفيد
الراجح
الوزير: وهيدا الي خلاني استقبلك بهالسرعة، خير في شي
رسالة بتحب توصلا من جناب النائب.
مداح: صراحة بدي انقلك رسالة علساني مش علسان النائب
الوزير: هيدي حكي خطير تفضل تنشوف شو عندك.
مداح: حضرتك وزير الأشغال وبتنسب لنفس الدايرة
الانتخابية الي بيترشح فيا الأستاذ مفيد
الوزير: النائب بيترشح وين ما كان وبأيا دايرة هيدي
انتخابات نيابية مش بلدية
مداح: أكيد أكيد، بس حضرتكون بتنتسبوا لنفس الحزب
السياسي.
الوزير: المطلوب؟
مداح: سؤالي: ليه ما بتجمع المجد من أطرافو؟
الوزير: ما فهمت؟
مداح: يعني بتكون نائب عن الدايرة ووزير الأشغال بالوقت
نفسه.
الوزير: كل شي بوقتو
مداح: وهلأ وقتو
الوزير: (وبدت عليه علامات الارتياح): كيف؟ ما فهمت؟
مداح: القضايا التنموية
الوزير: كمان ما فهمت
مداح: ما بخفيك ظن. الأستاذ مفيد عم بيحاول يستقطب رجال
أعمال تيستثمروا بدايرتكون يعني مشاريع مستشفيات ومدارس ومطاعم وتشغيل يد عاملة،
وكلنا منعرف الانتخابات النيابية عالبواب، وانتخابات نيابية جديدة يعني تشكيل
حكومة جديدة يعني…
وزير: يعني شو؟
مداح: إذا وظف الاستثمارات بدايرتو تخيل كيف ممكن يجمع
المجد من أطرافو النيابة والوزارة
الوزير: (مرتبكًا) بهالحالة مصلحتك معو. ليه حكيتني
هالحكي ما حكيتو قلو؟
مداح: أول شي أنا بحترم شخصك وبقدرك و…
الوزير: من الآخر أنت هون تتحقق مصلحة خاصة فسرلي ليه ما
لقيت مصلحتك معو وبلا مجاملات ما الا لزوم.
مداح: الي فيك تعملو حضرتك بشهرين بدو الأستاذ مفيد سنين
تيحققوا
الوزير: كمان ما فهمت
مداح: يعني أكتر شي ممكن يعملو الأستاذ مفيد يستقطب
استثمارات بصورة شخصية، انت فيك تعملا بشكل رسمي مع غطاء حكومي. يعني باسم الدولة
والحكومة بتعمل كل المشاريع الي ممكن يعملا الأستاذ مفيد وكل هيدا بإطار رسمي
طبقًا لطبيعة الوزارة الي مكلف حضرتك فيا.
الوزير: بكون سكرت الطريق عليه
مداح: وضمنت ترشحك للنيابة.
الوزير: مش مضمونة.
مداح: الوزير الي بيعمل مشاريع تنموية هوي الطفل المدلل
بعيون الشعب.
الوزير: وكيف بدي استدرج العروض؟
مداح: هيدا ملف كامل عن كل شخصيات رجال الأعمال الي
تواصل معون الأستاذ مفيد من 6 أشهر لهلأ وفيك بحنكتك تعرف كيف تستقطبون. الغطاء
الوزاري ضمانة أكتر من الغطاء النيابي أو أنا غلطان؟
الوزير: يعني خيانة عينك بنت عينك.
مداح: حضرتك قلت المصلحة.
الوزير: بس بعد ما عرفت وين مصلحتك أنت بهيدا كلو؟
مداح: كون مستشارك السياسي، وجزء من صفقتك مع رجال
الأعمال.
الوزير: ما بقبل.
مداح: معالي الوزير كل شي قلو تمنو. ومواد البنا
والأدوات الصحية وغيرا وغيرا كلو ممكن ينلعب بمعايرو.
الوزير: المطلوب
مداح: 20 بالمية من قيمة الصفقة.
الوزير: 10 بالمية.
مداح: و5 للست سعاد.
الوزير: 12 بالمية لقلك وللست سعاد.
مداح: بأمرك.
الوزير: شو بيضمنلي بس تلاقي فرصة أفضل ما تنقلب عليي؟
مداح: العين ما بتعلا عالحاجب.
الوزير: بتعلا. رح كبرك، لانو انا كمان الي مصلحة معك.
بس الي بيخون مرة بيخون كل مرة. وأنا بعرف وقت الجد كيف كسرلك جوانحك.
مداح: العفو معالي الوزير.
الوزير: الي متلك كنز بس لهيدا البلد، لعربستان الغرقانة
بالفساد. بس برجع بحذرك، النهار الي بتفكر في تتطاول عأسيادك رح تكون بخبر كان.
مداح: وأنا بطبيعتي ما بحب القواعد.
الوزير: اتفقنا. أو عندك رأي ست سعاد ما سمعتك حكيتي ولا
كلمة من أول الحديث؟
سعاد: أنا هون معاليك تكون جزء من الصفقة، وكل الي انحكى
ما عندي عليه ولا أي اعتراض.
الوزير: تشرفت بمعرفتك استاذ مداح. من بكره بتقدم
استقالتك من مكتب النائب مفيد وبتستلم مركزك الجديد.
مداح: الي الشرف معالي الوزير. بالإذن. يلا سعاد أخدنا
كتير من وقت الوزير.
الوزير: تفضل أستاذ مداح. سعاد خليكي في حكي خاص لازم
نحكي سوا.
مداح: بأمرك معالي الوزير.
سعاد: وأنا بأمر معاليك.
المشهد الأخير
واضح: معالي الوزير عنّا؟
طيب: قلتلك مداح مهما كبر ما بيكبر علينا.
مداح: مشتقلكون يا شباب.
واضح: أصغر وزير أشغال بتاريخ الوزارة، بدي أعرف كيف
ضربت عصفورين بحجر واحدة، طيرت النائب والوزير بفضيحة وحدي.
طيب: خير كلو خير المهم ما حدا يأذيك.
مداح: كلو كان مسجل. وقدمت التسجيلات للحزب، وخليت
الأمور خاصة مش رسمية، بس بتعرفوا ما في شي بيتخبا بهالبلد.
طيب: بس طولت الغيبة هالمرة.
مداح: شباب بدي ياكون معي.
واضح: معك وين؟
طيب: بالوزارة؟
مداح: ايه بالوزارة.
واضح: خير يا طير يا خيي ما الك مصلحة معنا.
مداح: لأ الي مصلحة. العالم الي أنا في عالم تماسيح
وحيتان، وما حدا غيركن بيحميني.
طيب: ما فهمت.
واضح: ولا أنا.
مداح: أنا صح مداح، ومصلحتي فوق كل اعتبار. بعترف انو
جرحت ناس، وتآمرت عناس، وصاروا أعدائي بعدد شعر راسي، كل يوم بيطلوا بمنامي
يخوفوني من بكره.
واضح: ونحنا شو النا علاقة بأعدائك؟
طيب: بالضبط ما فهمت.
مداح: واضح انت خسرت وظيفتك وحبيبتك لأنك واضح، وطيب انت
خسرت وظيفتك وحبيبتك لأنك طيب، ونحنا أصدقاء فكيف ممكن أمّن لحدا يكون واضح وصريح
معي وأمنوا عمستقبلي غيرك يا واضح. وكيف ممكن أمن ما حدا يطعني بضهري وينهبني الا
إذا كنت حدي يا طيب؟
واضح: وإذا شفت أشيا غلط؟
طيب: وإذا شفت ناس محتاجة ودقيت بابك؟
مداح: بتعرفوا قصة العقرب والضفدع؟
واضح: لأ
طيب: كمان لأ
مداح: كان في عقرب بدو يعبر عالضفة التانية من الشط وما
بيعرف يسبح، فراح عند الضفدع وقلوا حملني عكتافك، قلوا الضفدع بركي عقستني، جاوبوا
العقرب: مصلحتي معك إذا عقستك منغرق تنينانتنا. اقتنع الضفدع وحملوا عكتافوا، وبنص
النهر حس الضفدع بعقسة ونار عم بطلع من ضهرو قلوا عقستني يا عقرب؟ جاوبوا العقرب:
سامحني هيدي طبيعتي مع انو رح نغرق سوا.
واضح: ما فهمت.
طيب: ولا أنا.
مداح: انتو أصدقاء حقيقيين، وطبيعتكن الإخلاص والوفا
والطيبة.
إذا شفت غلط يا واضح ما تكون الا واضح.
وانت يا طيب وين بتشوف مساكين ومعترين ما تكون الا طيب.
وهيدي الساحة الدائرية الي كانت تجمعنا رح اتضل تجمعنا،
لانو الدايرة عقد ما بتدور بيضلوا الي جواتا جواتا لا بيتخلوا عن بعض، ولا بيسمحوا
لحدا يفوت بيناتون.
تمّت
للتواصل مع الكاتب عبر الفايسبوك: https://www.facebook.com/bassel.b.elzein
