الضّلال
تأليف:
باسـل الزّين
إشراف
وتعديل وتدقيق:
الأستاذ
نجيب نعيمة
“كلّ
من لم يمت تحت خيل الفتوحات
مات
اختناقًا على الدّرب
بين وجه
الحبيبة والأمنية”
شوقي بزيع
الفصل الأوّل
المكان : منزل في مدينة
لبنانيّة.
الزّمان: أيّامنا الحاضرة.
المشهد الأوّل
( ينفتح المشهد على أب يهنّئ
ولده بنيله شهادة الدكتوراه)
الأب :إيه، بعد كل هالسّنين
والتّعب يا ابني، بعد كلّ القهر والتعتير، حلّن دمعاتي ينفجروا فرح ويقولوا يا
هالماضي المليان يأس وقهر حلّك تخلص وصار لازم نغنّي ونفرح.
شهادة الدكتوراه يا ابني
حقّقت حلمي وشفت كل الي ما قدرت حققو بحياتي
رشاد : يطوّل عمرك يا بيّي
وان شاء الله بحققلك كل أحلامك
لولا وقفتك حدي وتشجيعك الي ما
كين ممكن حقق الي حققتو
الأب: يا بيي جمايلك كترت،
إنت رجّال كبير
من سنين بس فلست بمشروعي
الصغير
اخواتك كلّ واحد منّن التها
بهمّو
وحدك حرمت حالك من كل متع هالدّني
تا تخلّي
هالبيت مفتوح متل الأوّل
وأحسن
رشاد: إي لس هالبيت هوّي
الّي يلّلي عمل منّي رجّال
حقو عليي ادملو حياتي كل
حياتي كرامتو
صدقني يا بيي اد ما قدّم
بضلّ مقصّر، ولمين عم قدّم، ما انتو أنا.
(دخول الأمّ)
الأم: تعا لقلب أمك تقبر امك
انشا الله
رفعت راس العيلي، رفعتلنا
راسنا، تقبرني انشا الله
رشاد: راس العيلي مرفوع
بوجودكن يا أمّي
الله لا يحرمني منكن
(دخول الأشقاء)
جهاد: والله شي بيكبّر القلب
يا خيّي
ألف مبروك ، إنت بكل شي
شاطر، وبتنقاية البنات الكويسين، شو في شي؟
سهاد: اوعا اتبطل تعبرنا يا
خيي
مهما كبرت بضلك خيي الصغير
وكلمتي هيي الي بتمشي، مش
هيك؟
حازم: انا بس اخدت البروفيه
من بعد 8 دورات
الي بيك بدك تكمل
التلو لي في شي بعد
البروفيه؟
ليك اذا بعد بشوفك حامل كتاب
والله ضاربك
رشاد: العلم الو اول بس ما
الو آخر يا خيّي، وهيدي شهادة صغيرة إدام بحر العلم.
حازم: روقها شوي ابو الرور ،
طوّلي بالك وروح شوف الدّني يا زلمي
رشاد: والله حبكن الي،
وثقتكن فيّي أحلى شهاده
والعين ما بتعلى فوق الحاجب
انتو تاج راسي
الأم: رشاد بدنا نشفلك ولد
روح تزوّج.
الأب: ايه والله يا ام جهاد الصبي
حرم حالو من كل شي كرمالنا، متجوزنا ومتجوز كتابو
جهاد (وقد بدت عليه علامات
الارتباك)
هلق خلي يعيش لاحق ينحبس
حازم: هادا حكي، لكن بدّك
يعلق متل ما علقنا
سهاد: شو ايجينا من ورا
الزواج غير الوجع والهم (بضحك واستهزاء)
الأب: ولو شو بكن، حاش
تنقّو، بدكن تجوزو ولاّ بدكن تيأسوا؟ استرونا بقا وخلّينا بفرحتنا
حازم: يلاّ صار بدّا فلّي،
نهاركم سعيد.
جهاد: خلونا نفل بلا ما
يطلعنا من تيابنا
سهاد: يالله ألف مبروك يا
خيي والله يهنيك
حازم: انا تأخرت عشغلي،
هاتلك بوسه وبخاطرك
(يبقى الأب والأم ورشاد)
الأب: كل اخواتك تجوزو الحمد
الله بنات عيل، اجتماعيات كويسه، ليرات في، شهادات في، الحمد الله يا ابني.
رشاد: الله يهنيون يا بيي
الأم: بس انت عروستك لازم
تكون غير شكل
الأب: انت عروستك يا ابني مش
بس لازم تكون بنت بيت وغنية ومتعلمة
لازم تكون …. لازم تكون
ما بعرف كيف بدي عبّر بس
جمالها جمال رباني
وعلمها ما بيقل عن علمك
و…
رشاد: ابو جهاد
نتفي نتفي عليي
الامور ما بتنقاس بهالطريقة
يا شيخ
الأم: لا، والله بتنقاس
واكتر
شو ناقصك
رشاد: الحب يا امي الحب، كلّ
هو الي سمعتون وما في حبّ ولشو؟
الأب: بلا حب بلا وجع قلب،
ما تعملي حبك نار هلق
الي متلك عقلو هوي بيختار
عنو مش قلبو
رشاد: الحب يا بيي سر وجودنا
بهالحياة
الحب بسيط وبسيط كتير
ما بيعترف بالأدوار الكبيره
والمظاهر الخداعة
الحب لحظة انخطاف بيخلّي
العالم كلو يصير شعلة مقدسة من المشاعر والاحاسيس
شي متل البرق بيضوي السّما
بينص الليل
الحب بعمرو ما بينقاس
بمجموعة قواعد وترسيمات جاهزة وقوالب خالصة، شو بكن يا جماعة؟
الأب: مشكلتك يا ابني انك
كتير مثالي
وبعدك عايش دور بطولة
بمسرحية خيالية
وساكن بأوهام رومنسية رح
تشوفا فرطت ودابت بعد شهرين ثلاثة من الزواج
رشاد: بيي بدي افترض حكيك صح
ما انتو مسؤولين معي
بالموضوع
وهالبنت الي راسملي ياها على
فرض انو كان الا وجود كيف بدا ترضى بوضعي
الأم: يصحلها، وليمونة حامضة
الأب: لوقتا فرج، لوقتا فرج،
ما تعطلو هم، وكل شي بيصير
(يخرج الاب والأم ويبقى رشاد
وحيدًا)
رشاد: المواجهة كبيرة يا
رشاد بس ما عندي خيار تاني
صار الوقت يعرفو يا حنان
سنين ونحنا ناطرين
بيكفيني هرب
صار لازم كافيك عكل شي عملتي
كرمالي، حنان ما بقا بدي أهرب
المشهد الثاني
(منزل جهاد، ويبدو الجميع في
حالة قلق عظيمة ، ومجتمعين على طاولة غداء)
جهاد: والله العظيم قلبي
ناقزني، حاسس في شي ومش مسترجي احكي
ياما قلتلكن منعو بأيا طريقة
ما تخلو ياخد الدكتوراه
حازم: بدكن تجوزو
هيدا الي كان ناقص
سهاد: هلق تيلاقي البنت الي رح
يرضى عنا بيك فرج
جهاد: بينكشا من تحت الأرض
شخص بعلمو وشبوبيتو الف وحدي
بتموت عليه
سهاد: والحل؟
حازم: والله ما بعرف
لح يطيرو ضبانيت عقلي، إذا
بيتزوج مين رح بيقيم بأمي وبيي؟
جهاد: فكرو خيكن رشاد إذا
تزوج منصير نساعد بيو ونشيل معو جزء من المصروف والأجار
يشك براسو ريش، قرش مش حاطط
عالبيت
سهاد: بدو يجهز
ويقسط، ويعمل عيله، ويشتريلا
سيارة
ومدامتو من غير شر أكيد بدا
نكون كلنا متل بعض، ونصرف عابيت بيو كلنا بالتساوي ونتشارك بالموضوع
جهاد: لازم بأيا طريقة نطفشا
حازم: للازم لازم بس كيف؟
سهاد: بخاف قولا
جهاد: ولك قولي مش وقت خوفك
هلق
سهاد: إنو في حلّ
حازم: خلصينا انطقيها
هالجوهرة
سهاد: منشوه سمعة البنت ادام
أمي وبيي
جهاد: بس كتير مفضوحة، وخصوصي
إذا كانت بنت اصول وجاه وعز كيف فينا نفوت هالفوتة
سهاد: هيدي تدبيرتا عندي
حازم: يسلملي عندك أنا
سهاد: ايه بس همتكون معي
هالتدبيره بدا وقفه رجال
جهاد: كل شي ما بيقرب
عالجيبة منعملو
سهاد: إنت مش بالك إلا
بجيبتك، طمن بالك ما حدا رح يجي صوبك
وهلق خلي يحب عراحتو تا يشبع
حازم: ولك كاس احلى اخت
بدنيا
جهاد: الله يخليكي فوق راسنا
اي يا هيك بتكون الاخوه يا
بلا
المشهد الثالث
(حنان ورشاد)
حنان: يا خوفي تستحي فيي
رشاد انت كبرت وما بدي كون
مش من مستواك
قولك لح انحرم منك؟
مش قادرا اتخيل حياتي من
دونك
رشاد: حنان، حياتي
لي عم بتقللي من قيمة حالك ؟
لي عم تفكري هيك؟
حنان: إنت منك عارف لي؟
رشاد: لاء مني عارف
حنان: اول شي مني معلمي
اهلي ناس فقرا كتير
كتر خيرون وصلوني لأول سنة
جامعة
نحنا ناس معترين كتير يا
رشاد
شرفنا واخلاقنا هني كل
ثروتنا
انت مخيل انو دكتور متلك
يقنع أهلو يطلعو عبيت سقفو تنك وحيطانو كرتون؟
رشاد: هالبيت الي سقفو تنك
وحيطانو كرتون
في رجّال ربا ولادو على
المبادئ والقيم والأخلاق
الي متلك قلال يا حنان
ما تخلي الأفكار السودا
تسيطر عليك
حنان: بس
رشاد: بس شو؟
وين الحب الي بيكسر كل
الحدود وما في شي بيوقف بي وجو؟
حبنا يا حنان اقوى من الزمن
ومن العيلة ومن الفقر والجوع
حلنا بقى نختار
الحرية حق
وانا بعمري ما بتنازل عن حقي
حنان: وأخوتك، وعيلتك.؟
رشاد: بس يعرفو إنتِ شو
بتعنيلي، ويعرفو أدي حياتي مرتبطة بوجودك
وبالوقت نفسو انّو ما بتخلّى
عنن ولو شو ما صار
وقتا اكيد لح يقدروني
وما لح يوقفو بي وجي
اهلي ما بينسو انو باللحظة
الي كل اخوتي تخلو عنون
انا ضحيت بأحلى سنين عمري
تا ما يتغير شي عليون ويضل
راسن مرفوع بالمجتمع، لأ، لأ أنا كتير واثق بالموضوع
حنان: عن جدّ، عن جدّ؟
رشاد: صح إنّو الأمر مش
بهالسهولة والبساطة
بس بأكدلك يا حنان انو حبنا
أقوى من الزمن والظروف والعيلة والقدر والمصاري والنّاس
حنان: اوعدني ما بتتركني لو
شو ما صار
رشاد: انتِ حلم عمري يا حنان
انتِ ايامي الي جايي
إنتِ فرحة وجودي وأمل سنيني
من دونك حياتي منشفة متل
النهر بتشرين
حنان: ما بعرف ليش خيفاني،
كتير مصقع جوّاتي
رشاد: وحياة عيونك إنتِ الي
إلاّ إذا أخدني منك الموت
حنان: دخيلك ما تقول هيك
رشاد: فكرك ممكن اتخيل حياتي
من دونك؟
حنان: حياتك حياتي، حياتي
إنتَ
وحتى الموت صدقني ما بيقدر
يفرقنا عن بعض
الفصل الثاني
المشهد الأوّل
رشاد وخالد
رشاد: هيدي قصتي يا صديقي
خالد: قصتك مش سهلة يا صاحبي
مش سهلة أبدًا
رشاد: انت شو شايف
خالد: المشكلة مش متل ما انت
مصورها
رشاد: شو يعني؟
خالد: اخواتك بعمرن ما
بيكونو مشكلة الا اذا بدن يحطو العصي بالدواليب
رشاد: مش عم بفهم
خالد: فكرك بيك ممكن يوافق ع
حنان؟
رشاد: ليه من شو بتشكي
خالد: بالنسبة الي والك ما
بتشكي من شي يا رشاد
بس بالنسبة لبيك الوضع مغيّر
رشاد: ما تقلي الوضع
الاجتماعي والعلم
خالد: هيدي شماعة بيعلق
عليها فشلو
المشكلة انو بيك شايف فيك يللي
ضاع، يللي حلم في وبقي حلم
رشاد: وضّح
خالد: كل الي ما قدر يحققو
بحياتو وتمنى يوصولو
انت حققتو ووصلتلو
رشاد: وشو خصّ هيدي بهيدي؟
خالد: من وقت الي صرت دكتور
بطلت ابن ابو جهاد صرت ملك ابو جهاد
وانت بتعرف ما فيك تتصرف
بملك حدا الا إذا هوي وافق، مش هيك؟ إنت صرت ملكو مش ابنو فهام
رشاد: هالقد؟
خالد: وأكتر
رشاد: بس انا ما بدي غير
هالبنت
انت ما ممتخيل شو عملت كرمالي
هيي البسمة الي حلمت اضحكا
سنين وعم ترفض عرسان كتار
متلي وأحسن
كان فيا تريح أهلا من فقرن
وعذابن
وقالت لأ الي بيحب بيتحمل كل
شي
وانا لح اتحمل كل شي شو ما
كان التمن
خالد: فيك تتحمل دم بيّك يا
رشاد؟
رشاد: دم بييّ؟
خالد: اذا اخدت حنان بيك
بيروح فيا
رشاد: ما تبالغ ولوووه مش
هالقد
خالد: واكتر
اخواتك كلن لح يكونو ضدك
ومش بعيد امك تتنكرلك
ذنب البي كبير يا رشاد كبير
وصدقني إنت ما فيك تتحملو
المشهد الثاني
(بيت العائلة)
رشاد: أنا حبيت إنّو كلكن
تكونوا هون اليوم
وحقق أمل أمي وبيي وفرحّكن
فيي
جهاد: خبّرنا روّج شو القصة؟
لقيتا؟
حازم: قلّلي مينا خبّرني
سهاد: معقول بهالسرعة خلّصنا،
مين سعيدة الحظ؟
رشاد: بصراحة ومن دون زعل
هيدي أول مرة بحياتي بخبي
عنكن شي
بحبا من خمس سنين
وقفت معي عالحلوة والمرة
واتحملت عذاب وقهر وما كانت
ترضى بحدا غيري
الأب: الله يبارك فيا يا
ابني
طمني معلَّمي؟ غنية؟ بنت ناس
جهاد: خمس سنين والله عيب يا
ابو الرور
حازم: الي بتفكرو موسى بيطلع
فرعون
يا ولد يا حبيب
سهاد: الي حلوي متلي؟
رشاد: حلوي يا اختي حلوي
وأنا مني فرعون يا خيي
متلا متلنا منّا غنيي
بس اهلا بيشرفو اكبر ناس يا
بيي
الأب: كيف مش غنية واهلا
بيشرفو ولك يا ابني فهني ياها هالشغله؟
رشاد: وليش أيمتا كان المال
بيشرّف النّاس يا بيي؟
مش هيك علمتني، إنت مش عاهيك
ربّيتني؟
الأب: إي، لأ،
هلق المهم بيا شو بيشتغل؟
اصلها ، فصلها خبّرنا
الجميع: احكي خلصنا
رشاد: لح وفر عليكن اسئلة
كتيرة ونطرة بطول خمس سنين
انا قررت من بعد اذنك يا بيي
اتزوج حنان بنت الناطور
الجميع: شو
الأب: الناطور
الأم: بنت الناطور
حازم: شو جنيت
جهاد: شوفتو عم بيهلوس، جنّ
الزّلمي
سهاد: دكتور يتزوج شحادة بنت
شحاد
الاب: بربك قول انك عم بتمزح
قول انك عم بتمزح بحياة الله
اكيد منك بعقلك يا ابني
اكيد شربان ، بيك شي؟
رشاد: بيي انت علمتنا ما
ننسى أصلنا
حازم: عم بتعير بيك بأصلو
جهاد: تركو تركو يحكي الهيئة
جن عن جد
سهاد: افترض انو كان أصلنا
وضيع بس ما شفت بيك كيف طور وضعو وخلينا نصير احلى الناس
رشاد: بيي
قولك لو ضليت ببيتك المسقوف من
تنك مهجور كنت لح تنقص بعينا؟
الأب: لأني تربيت ببيت من تنك
برفض ارجع عبيت من تنك
رشاد: وسعادتي وفرحي؟
جهاد: خلص اسكوت بقا وبلا طق
حنك
حازم: قال متعلم ايه والله
الجهال استحو يعملو عملتك
سهاد: وين البرستيج؟
الأب: انت يا رشاد انت
انت مش عارف قيمة نفسك، مش
عارف مين لازم تاخوذ؟
اي بنت الملك قليلة عليك
رشاد: خلصنا بقا، خلصنا
وين كنتو انا وعم كافح وحدي
تاحافظ عهالبيت
كل واحد منكن شايف حياتو
ومصلحتو وبيتو
وما فكر نهار يسألني كيف
فينا نساعدك يا خيي
ما تفتكرو عم بعيركن
ما حدا بيعلم حدا كيف لازم
يتصرف بأصول
جهاد: سكوت، حاج تربّح
جميلة، هيدي واجباتك
حازم: اول مرة بشوف انسان بيمنن
اهلو انو عم بيساعدون، استحي يا زلمي
سهاد: ليك هالحكي، ليك
هالجرصة
رشاد: بتعرفو شو، جد شر
البلية ما يُضحك
جهاد: كتر خيرك والله
كأنّو كل واحد منا عندو
مسؤولياتو، وهمو مش عاقدّو
حازم: خلينا نترك بيوتنا
كرامة عينك ونموت ولادنا من الجوع
اسم الله شو فهيم وكبير
سهاد: بريستيجي ما بيسمحلي
قول لزوجي اهلي بدّن مساعدة
الأب: وصلت فيك الأمور لهون
يا رشاد
اكيد هيي الي حاشيتلك راسك
اسمعا ولا
لو بتوقف عراسك شك
ما بجوزك ياها
ولو اضطريت بنكرك وبنكر إنّي
بيّك ولا بعرفك ولا بتعرفني
رشاد المتعلم الدكتور
الفهمان ياخود هيك بنت، لا فشرت وكتّرت
والله ما عم بصدق، ما عم
بصدق
رشاد: رشاد رشاد رشاد
المتعلم الفهمان، الدّكتور
ياخود هيك بنت، إي هيدي مش مخلوقة عندا أحاسيسا وفكرا وقلبا وعواطفا
والله خليتوني اكره العلم
واكره حالي وإكره اني خلقت
سنين انت ومتملكني (متوجّهًا
إلى أبيه)
بدك ياني نسخة عنك
صورة من كتاب ايامك السود
ليه شايف فيي فشلك وسنين
عذابك
شو ذنبي اتحملني مسؤولية
اخطاء انت رافض تدفع تمنها
كل اخواتي نقو يللي بدن يا
وانت نفسك نقيت الي بدك يا
بعمري ما قلتلك لق
بعمري ما رفضتلك طلب
وجايي اليوم تحرمني من حق
عطاني اياه الله
ما تعوض فشلك فيي يا بيي
ما تعوض فشلك فيي
الأب: فيك توقّف لتّ وكترة
حكي، سكوت بقا سكوت (آخ)
(يصاب بنوبة ويسقط أرضًا)
الجميع: بابا بابا
جهاد يمسك رشاد من قميصه
ولا قتلك بيك ، قتلتو!
حازم: والله دمك ودمها ما
بيكفوني
سهاد: وين برستيجي، وين؟
ابن قتل بيو، خيي قتل بيي
الأم: (منهارة)
بو جهاد بو جهاد
الله لا يوفقك شو عملت فينا،
الله لا يوفقك لا هلق ولا يوم القيامة
المشهد الثالث
بيت خالد
رشاد: جايين تكملو عليي يا
اخواتي يلي من لحمي ودمي
جهاد: مرتي رح تترك البيت
اذا انت تزوجت حنان، منشان هيك انت non حنان، فهمت؟
سهاد: ما عم بصدق لِعم بيصير
برستيجي لح يتكسر ادام اهل جوزي وادام جوزي يا الله
رشاد: بيي كيف صار، خبّرني
يا جهاد
جهاد: والك عين تسأل عنو،
وبكل وقاحة عم بتسأل!
حازم: بيقتل القتيل وبيمشي
بجنازتو
سهاد: بابي بعدو كتير مريض
كتير
بليز بليز فيق
رشاد: المطلوب
جهاد: انس موضوع حنان وكل شي
بيرجع مطرحو
حازم: ما معقول الي عم بيصير
ما تكون أناني وغبي
سهاد: non بيتي ينخرب nonnon
رشاد: فيكون تتركوني وحدي
ولو سمحتو، كتير محتاج كون وحدي، عملوا معروف
جهاد: ما تنسى انو بيك بين
الحياة والموت
حازم: ما تكون اناني يا رشاد،
وعا انت سكران
سهاد: راعي برستيجي
رشاد: تركوني وحدي أنا
بحكيكن
جهاد: بتمنى ترجع رشاد الفهيم
، فكر واحكينا
حازم: ما تتأخر بالجواب،
خلينا نعرف بكّير شو مخبيلنا
رشاد: خير ان شاء الله خير
المشهد الرابع
(خالد ورشاد)
خالد: الي عم بيصير معكن شي
كبير يا صاحبي
رشاد: مخنوق يا خالد مخنوق،
حاسس قلبي رح ينفجر، هادا مش عدل، هادا مش حق
لأول مرة ما قدران اخود قرار،
ولا بدّي آخد قرار
ساعدني يا صاحبي ساعدني
خالد: صديقي
تتبني بيتك الخاص ما فيك
تهدم أربع بيوت
رشاد: انت الي عم بتقول هيك
خالد: صديقك من صدقك لا من
صدقك
والضحية ضريبة الشريف
بمجتمعنا اليوم
رشاد: وليه كل مرة بدي كون
أنا الضحيّة ؟
خالد: قدرك يا صاحبي قدرك
رشاد: وحنان ؟ حلم عمري ونور
سنيني وأمل حياتي، أصدق شي بحياتي وأنبل شي بحياتي
خالد: لح تقدر تحمل دم بيك
يا رشاد
لح تقدر تحمل انو تنخرب 4
بيوت كرامة حنان؟
لح تحمل تطلع من أهلك
الأهل مهما كانو غلط ما فينا
نطلع منون
بيقسونا بيرحمونا بيرجمونا
بيحضنونا بينكرونا بيفهمونا ما بيفهمونا
بس بيضلو اكتر ناس بيحبونا
شيلك من اخواتك
مش غريب تكون يوسف هالعصر
بس بعمرو ما حدا حبك قد بيك
حبك اكتر ما حبتك حنان نفسها
يمكن حبك غلط، بس حبك كتير
ما فيك تعاقبو لأنّو حبك
كتير بس غلط
يمكن تنسى حنان ويمكن ما
تنسيها
بس الأكيد انو ما لح تقدر
تحمل دم بيك يا صاحبي
رشاد، أنا صديقك وبقلك موقفك
ما بتنحسد عليه أبدًا أبدًا
المشهد الرابع
بيت العائلة
رشاد: صار فيكي يا اختي
تحفظي برستيجك ادام اهل جوزك وجوزك
وانت يا خيي بعمرو بيتك ما
لح ينخرب
حازم صعب عليي ومستحيل اخرب
بيتك بايدي
متل ما هوي صعب عليي احمل دم
بيي
الليلة لح انهي الموضوع مع حنان
وكل واحد يروح بطريق
جهاد: هيدا خيينا الي منعرفو
والله بيعوض عليك بالي احلى منا
حازم: الله يبارك فيك يا خيي
يا ابو الرور يا ملك
سهاد: مرسي ، وميل مرسي حفظتلي
برستيجي واووو شو مبسوطة
الجميع: هلق صار فينا نروح
نطمن عبيك ونطمنو
حضر حالك تا تزورو بالمستشفى
رح يفرح بقرارك الحكيم
رشاد: إنشا لله ، إنشا لله
الفصل الثّالث
المشهد الأوّل
(رشاد وحنان)
حنان: رشاد أنا جيت بس كتير
بردانة
رشاد: أنتِ بردانه وأنا
جوعان
يا حنان بردك وجوعي صحراء
قاسيه
حنان: ما تاخدنا عدربا يا
رشاد منضيع
رشاد: هجر قد كان من خوف هجر
وفراق قد كان
خوف فراق
سامعا هيدا البيت
حنان: مش سامعتو
بس خيفانه إفهمو
رشاد: ليكي يا حنان، أنا بدي
اتركك أحلى ما اتركك
وبدي فل حتى ضل حدك
حنان: شو قلت؟ ما فهمت؟ بدك
تتركني؟ بدك تتركني أنا؟
رشاد: أنا طالع على بيتنا
العتيق بالضيعة
أنتِ رح تبقي ببيروت، بس أنا
لح آخدك معي
أنتِ مش رح تسكني معي بس رح
تسكني فيي
نحنا سوا مش رح نعيش بس أنتِ
رح تعيشي فيي
حنان: رشاد، رشاد
رشاد: بتتذكري بيتنا العتيق،
أخدتك عليه مرة
بتتذكري الكرم قدامو؟ أنا
بدي أترك المدينه يا حنان
وشهادة الدكتوراه رح لفها
وأبعتا لخيي
بعلقها عندو بالصالون
حنان: وأنا لح تلفني وتبعتني
لوين؟
رشاد: مش عم تفهمي حنان،
قلتلك انتِ باقيي هون بس لح آخدك معي
حنان: دخيلك ما تقتلني، إذا
تركتني يعني قتلتني
رشاد: يا حنان بطلت عارف مين
لازم أترك وبطلت عارف مع مين بدي ضل
يمكن الكرم العتيق والبيت
المصقع يفهموني وبقدروني أكتر من أهلي ومن هالمدينة المليانة غشّ
أنا لازم فل
حنان: رشاد، رشاد
المشهد الأخير
خالد: جيت لأنو كان لازم كون
حدك، وخصوصي اليوم يا رشاد
رشاد: عم بتعرف عنها شي
خالد: ما حدا رح يعرف عنها
بقا شي، حنان ماتت
رشاد: انتو مش رح تعرفو عنها
شي بقا
بيي وخيي وأمي وأختي مش رح
يشوفوها بقا
ماتت عندن وعند أصحابها وعند
بيها وأمها
حنان يا خالد لا بتموت عندي
ولا بتفارقني
حنان كانت وبقيت وبتضل معي
خالد: مش رح توقف شعر وعاطفة
وحلم
عم قلك حنان راحت
وحلمك وشعرك وعواطفك خسّروك
كل شي
خسّروك أمك وبيك وأخوتك
خسّروك حنان
وخسّروك حالك
رشاد: لا يا خالد أنا ما
خسرت، أنا ما تنازلت
بيي ربح، وخيي ربح، وإختي
ربحت
وأنا كمان ربحت ما خسرت بس
ربحت مخنوق
بتعرف كيف مخنوق؟
مخنوق متل ما شوقي بزيع
بيقول
“كلّ من لم يمت تحت خيل
الفتوحات
مات اختناقًا على الدرب
بين وجه الحبيبة
والأمنية”
ايه يا خالد خنقني الرّبح
خنقني الضّلال
(ستار)
للتواصل مع الكاتب عبر الفايسبوك: https://www.facebook.com/bassel.b.elzein
