صدى الغريب
باسل بديع
الزّين
مراجعة
وإشراف
الأستاذ
نجيب نعيمه
“…إذا
الشّمس الّتي أقصدها
باتت
ورائي”
المكان: بيروت – لبنان
الزّمان: أيّامنا الحاضرة
(مسرحيّة في فصل واحد)
منزل عارف اللبّنانيّ
الشخصيّات: الجدّ: عارف اللّبنانيّ – الأب: نديم _
الأمّ: سلوى _ الابن الأكبر: ثائر _ الابن الأصغر: نادر.
المشهد الأوّل
تفتح السّتارة على منظر الجدّ يتصدّر إحدى المقاعد
المتواضعة.
( يدخل ثائر الابن الأكبر)
ثائر: صبحك بالخير يا جدي، والله العظيم بحسدك، بتنام
آخر واحد وبتفيق أول واحد. وهالكتاب خيك وبيك ورفيق عمرك.
الجد: “من شبه جده فما ظلم”
ثائر: العتب عقد المحبة يا جدي، معقول تكون اليوم طلبتي
وما تروح معي تتطلبلي؟
الجد: “عسى أن تكرهوا شيئًا وهو خير لكم”
ثائر: في بقلبك حكي يا جدي عقد الكتب الي قريتا (قرأتها)
كل حياتك، عأساس أنا ابنك الي ما خلفتو، وما ممكن تخبي عني شي، شو عدا ما بدا.
الجد: ثائر، كل شي بوقتو حلو، كل الي بقدر قلك ياه هلق،
ما تخلي الايام تخلّع بوابك، بعمرا الريح ما بتهز جبل. قدامك سبع تيام هني خلاصة
حياة يا بتكسرك يا بتكسرا، بس يا ريت من بعدا اضلك انت هوي انت، لانو اصدق لحظة
بوجودنا هيي الي منراهن فيا بعمرنا يا منربح كل شي يا منخسر كل شي.
ثائر: حكيك خوفني يا جدي.
الجد: بالحياة لازم يضل في بكره نخاف منو تا مننكسر،
انتبه.
(دخول نادر، الأخ الأصغر)
ثائر: صح النوم خيي نادر
نادر: حبيبي يا عريس، ليك خيي بحياة الي خلق ما تجرصنا
اليوم، اوعا تروح عند الجماعة وبايدك كتاب، بعرفك اهلك بيكونو عم بيطلبولك وانت عم
بتقرا.
الجد: نادر، روقها عالصبح
نادر: بأمرك جدو (يهمس في أذن أخيه) ما حدا نازعك غير
جدك
ثائر: ولك استحي هلق بيسمعك.
نادر: بشوفك بليل، بخاطرك جدو
الجد: لوين من غير شر.
نادر: في دورة ليخا رح تبلش بعد نص ساعة، وعمك ابو الندر
بدو يحرق الاخضر واليابس، قصة كبيرة.
الجد: يا ابني قرالك شي كتاب، حرام هالوقت الي عم بتضيعو
نادر: (يلتفت إلى أخيه) هي هي هي، كلّم، بتعرف شو جدو
نقيلي كتاب عزوقك وعطي لثائر وهوي بيقرا عني. بخاطركن.
(دخول الأب)
الأب: صبحكون بالخير، كيفك يا بيي
الجد: عايشين.
الأب: يلا قلبا نكد. (متوجهًا إلى ابنه) شو يا استاذ كل
شي تمام، ناقصك شي عايز شي.
ثائر: يخليلي ياك يا بيي، ناقصني رضاك.
الأب: ثائر، خدلك عطلة شي نهار وروح سجلنا هالشقة، شو
وقفت المدرسة عليك، كلو نهار الله لا يكسر حدا.
ثائر: نهار يا بيي، يعني سبع ساعات، يعني روحت
عالتلاميذ…
الأب: دخيل عرضك تركني من هالأسطوانة الي بتسمعني اياها
كل يوم
ثائر: عكل حال بعد كم يوم عيد المعلم، بروح بسجلك ياها
من عيوني.
الأب: كتير منيح.
(دخول الأم)
الأم: يقبرني العريس، والله وكبرنا يا ثائر.
ثائر: كل ما بكبر كل ما بتصغري، والله خايف يفكروكِ اختي
مش امي.
الأب: يا عين عالغزل، المهم ما تتأخري عشية باللبس،
موعدنا الساعة 8 مع الجماعة.
الأم: هياني نازلي جيب كل الغراض.
الأب: خيديني معك، خليني لحق الحلاق قبل ما تعجق عليه.
ثائر: عجبك حكي بيي يا جدي.
الجد: بيك شاطر يلعن الزمن، ومش عارف انو نحنا الي خلينا
الزمن غير الزمن، والدني غير الدني، ما تشغل بالك. الله يهونا عليك يا ابني الله
يهونا عليك.
المشهد الثّاني: (منزل سعيد سالم والد سلمى خطيبة ثائر
المفترضة)
سعيد: يا اهلا وسهلا بالاستاذ عارف، نورتونا.
الزوجة: والله حاسي كأنا منعرفكون من سنين.
الأب: القلوب عند بعضا.
الأم: حصلتلنا البركي يا ام سلمى.
سعيد: سلمى بنتي الوحيدة الي طلعت فيا من هالدني.
الزوجة: بدك تخبيا بعيونك يا ثائر.
الأب: يا استاذ سعيد.
سعيد: بلاها هيدي استاذ خلص صرنا عيلة وحدي.
الأب: بأمرك.
سعيد: ما يأمر عليك ظالم.
الأب: خيي سعيد، نحنا طالبين القرب منكون، وبدنا سلمى
تصير بنتنا متل ما ثائر حيصير ابنكن.
سعيد: منتشرف يا خيي عارف، البنت بنتكون، والله يديم
الوفق.
الأم: يشهد الله انك حتكوني بنتي الي ما عطاني ياها
الله.
الزوجة: ما في شك يا ام ثائر.
الأب: شو يا عروس ما بدا مستحا بقا صرتِ وحدي منّا.
سلمى: ما في شك، أكيد ما في شك.
الأب: هلق خلينا نحكي بالتفاصيل، بعرف تفاصيل ما الها
معنى، بس تقاليد وما فينا نطلع منا.
سعيد: هيدا الحكي المزبوط.
الأب: خيي سعيد بيناسبك انو يكون المأخر 10 آلاف دولار؟
سعيد: عفوا؟
الأب: بعرف كنوز الدني ما بتوفي سلمى حقا بس 10 آلاف
دولار مبلغ معقول.
سعيد: والمقدم؟
الأب: منقول متلون، 10 آلاف.
سعيد: كتير رخصت البنت يا خيي عارف.
الأب: انت قدي طالب؟
سعيد: يعني شي منو، بس 10 آلاف ما بتوفي
الأب: صدقني ما فيني ارفع السعر، ما بتزبط.
سعيد: انو بيع بخسارة انت ما بتقبلي ياها.
الأب: وانا اشتري بخسارة كمان ما بتقبلي ياها.
سعيد: طب لحلحا شوي.
الأب: يا خيي 10 آلاف مقدم وعشرين مأخر.
سعيد: يا خيي رح كون كريم معك، 30 ألف مقدم، وستين مأخر.
الأب: ليه شو بنتك بطل عالبحر؟
سعيد: ليه شو بينقصا
الأب: ما بينقصا شي، بس انت عم تطلب اسعار غير سعر
السوق.
سعيد: بضاعتنا، عفوا بنتي غير كل البنات. بدك قسطون ع 3
دفعات.
الأب: كمان 3 دفعات، لأ يا خيي، زبط المبلغ، وخلي
التقسيط عسنتين.
سعيد: والفوايد؟
الأب: ولاو بدك تاخد مني فوايد؟
سعيد: تركني فكر.
الاب: خود وقتك. يا رب ناطرين ردكن.
سعيد: الله يكون معكن وان شاء الله خير.
الزوجة: مع السلامة شرفتونا.
الأم: الله يشرف مقدارك.
المشهد الثالث
سلمى _ ثائر
ثائر: شو هالزمن الي وصلنيلو؟
سلمى: بيي بدو يبيعني.
ثائر: بالتقسيط.
سلمى: وبيك شو رأيو؟
ثائر: قال البيعة خسراني.
سلمى: صولد وأكبر.
ثائر: يا عيب الشوم.
سلمى: ثائر من ايمتن القلوب بتنباع وبتنشرا؟
ثائر: من وقت الي رفض جدي يروح معي عالطلبة، كان عارف كل
شي حيصير معي.
سلمى: وأنت شو رأيك؟
ثائر: سلمى انت عندي بالدني، ولاو نسيتِ عشو اتفقنا.
سلمى: قولك رح ننجح؟
ثائر: ما عندي ثقة بقرارنا؟
سلمى: اكيد عندي ثقة، والايام رح تثبتلك.
المشهد الثّالث
(الدوائر العقارية)
ثائر ونادر
ثائر: شو لزوما مجوتك معي.
نادر: انت اكتر شي بتعرفو الكتاب، والاجراءات القانونية،
بس ما بتعرف تلوفك.
ثائر: اللهم طولك يا روح.
ثائر: صباح الخير.
الموظف: (لا جواب)
ثائر: عفوا قلت صباح الخير.
الموظف: يا فتاح يا عليم يا رزاق يا كريم خير.
ثائر: ليه هالأسلوب،
الموظف: انا هيك اخو مرائي شي؟
نادر: ولك بأمرو، والله أجاد ربك ضغط وشغل ليل نهار.
الموظف: طوشي يا زلمي. شو فيني اخدمكن؟
ثائر: بدي سجل هالشقة من بعد اذنك.
الموظف: وراقك ناقصين، كملون ورجاع.
ثائر: كيف ناقصين وبعدك ما اتطلعت فيون؟
الموظف: حر، أنا حر، ما معاجبك اشتكي.
ثائر: ما بيحقلك ترفض.
الموظف: ليك هالحكي، فيك تتطلع من راسي.
ثائر: هيدي دولة قانون، شو مفكرا سايبي؟
الموظف: مرحبا قانون، وين بيصرفوا هيدي؟ حبيبي نحنا
موظفين قطاع عام بتعرف شو يعني قطاع عام.
ثائر: اكيد بعرف يعني نزاهة وشرف واستقامة
الموظف: (ضاحكًا) يا نوسو، ( متوجهاً إلى نادر) وين عايش
الشاب؟
نادر: ثائر من بعد إذنك نطرني برا شوي.
ثائر: ما بيصير هالحكي وين الضمير
نادر: فيك تنطرني برا شوي؟ انت خلصت الوراق القانونية
خلي الباقي عليي، بترجاك.
ثائر: قلنا حكي تاني بعدين.
نادر: (للموظف) خيي عيوش، يعني بالعربي ماوتن ديو، حبة
500 دولار منيحة.
الموظف: كلك نظر، هيدي تسجيل شقة.
نادر: 700 وما تكسر بخاطري.
الموظف: اعتبرا تسجلت.
نادر: روح يا كبير، الله يكتر من امتالك.
الموظف: يا استاذ
نادر: عيونو
الموظف: هالمرة مرقتا 700 بس تعودك عالمحل قصدي
عالدايرة.
نادر: يخليلي ياك، النا شغل مع بعض ما بيخلص.
الموظف: ابوسو
نادر: حبيبي.
المشهد الخامس
نادر: كان رح يفركش العملية كلا
ثائر: يا عيب الشوم، رشوة، انا ادفع رشوة
نادر: خلصني بقا، طلعلي من هالكتب الي عايش فيا
ثائر: نادر كتير عم بتزيدا
نادر: لا زيدا ولا نقصا، أنا رايح العب ورق.
الأب: ثائر، يا ابني، يا حبيبي، لايمتى بدك اتضل عايش
برات الزمن، فكرك الدولة مش عارفة انو موظفينا عم بيعملو هيك؟ فكرك هالقصور الي
عمروا، والسيارات الي الا اول ما الا آخر، وولادن الي باحسن مدارس، وغيرو وغيرو،
كل هيدا من معاشو. هالبلد كنز اذا صحلك تهبج ما تقصر.
ثائر: والقانون والأخلاق؟
الأب: خليك مدفون بمدرستك وبتلاميذك وبكتبك، كل الي
بعمرك سبقوك وصار عندن قصور. اصطفل هيدي حياتك، بس خسارة اضلك كل عالفترة مطرحك.
المشهد السادس
مدرسة الأخلاق الرفيعة الرسمية
مدير المدرسة
ثائر: حضرة المدير، الي عم بتطلبو مني شي كبير، وما
تاخذني بهالكلمة منو منطقي ابدا.
المدير: استاذ ثائر، شو يعني تلميذ آخذ 2 من عشرين تصير
20 من عشرين ولاو بيناتنا هالصفر
ثائر: اسمحلي هيدا حكي مش مسؤول
المدير: ايه بس المسؤول حكيني، وما فيني ارفضلو طلب
ثائر: اسمحلي انا ما بشارك بالهالجريمة.
المدير: فيك أو بلاك رح تتعدل العلامة
ثائر: اكيد ما بتمشي بعرف كيف كبرا
المدير: استاذ انت اكيد من حكياتك؟
ثائر: لهجتك فيا تهديد
المدير: فهمك كفاية.
ثائر: القانون بيناتنا.
المدير: مقبرة الحقوق بيناتنا.
ثائر: بخاطرك.
المشهد السابع
(منزل العائلة)
الأب: مبروك، ألف مبروك، ما حدا غيرك رافعلي راسي يا
نادر.
الأم: ليرات، لحق عليرات.
(دخول ثائر)
ثائر: خير يا جماعة شو في ليه هالضجة عالصبح.
الأب: خيك نادر صار فنان.
الأم: يقبر امو الجمعة الجاي بينزل اول سي دي
ثائر: خيي نادر صار فنان، بعمرو ما فتح كتاب ولا درس
موسيقى كيف صار فنان
نادر: انت خليك هيك، كسري مقاديفي
ثائر: له يا خيي بس شو عدا ما بدا
الأب: خيك بيشيلا من تم السبع
الأم: رح يصورولو فيديو كليب
نادر: سلطان الطرب “عبد عبودي”
ثائر: مين عبد عبودي
نادر: هيدا اسمي الفني
ثائر: والنعم، بس ما خبرتني من وين جبت هالموهبة
نادر: ليه مين قال الفن بدو موهبة؟ سماع بربك سماع غنية
من كلمات قادر قدوره وألحان صاحبنا موسيقي بلا نوطة، وطبعًا حضرتي رح غنيا، سماع:
كركرني جبيبي تحت باطي
نساني البس سباطي
رحت امشي حافي عالطريق
وقعدنا عالجسر الواطي
الأب: جديدة، عن جد جديدة.
الأم: قدي دفعولك عليا.
نادر: الدفعة الأولى 5000 دولار والحبل عالجرار…
ثائر: والنعم. الله يقويك ويشد الضهر فيك يا هيك بيكون
الفن يا بلا
نادر: عم بتتمسخر، ليه معاشك بالسنة كلا بيجيب هالسعر؟
ثائر: “إن هم ذهبت أخلاقهم ذهبوا”، بخاطركن.
الاب: شو بدك في، بربك سمعنا ياها.
المشهد الثامن
المدير: استاذ ثائر، هيدا قرار مباشر من مدير عام وزارة
التربية بيقضي بتوقيفك عن العمل.
ثائر: والسبب؟
المدير: التلاعب بنتائج الامتحانات وتسريب الأسئلة.
ثائر: والدليل؟
المدير: 10 شهود ومن بينن أهل تلاميذ قالوا أنك أخدت
رشاوي تتنجح ولادن.
ثائر: حتى القانون بيحمي القوي، وبيظلم الضعيف.
المدير: ليه من ايمتى كان القانون ببلادنا غير هيك.
ثائر: والحل؟
المدير: الحل كان قدامك وانت رفضتو.
ثائر: في ناس قالوا العدل مات
وانا بقول
العدل “فتح عتمة خيالو وفات”
الله يرحمك يا بلدنا
الله يرحمك يا بلدنا
المشهد الأخير
الجد: وانكسرت مع أول موجة يأس…
ثائر: ما عاد فيني كمّل يا جدي
سلمى: ما عاد فينا نتحمل
الجد: وين المبادئ الي بتكسر العالم وما بتتغير؟
سلمى: شو بدنا نغير تنغير، خلينا نفل أحسن ما نفتح عيونا
بنهار ونلاقي حالنا نحنا كمان تغيرنا.
الجد: قولكن السفر هوي الحل؟ الهرب يا سلمى، الهرب يا
ثائر؟
ثائر: بطل بدي كون ثائر.
ثائر على شو ولا شو ولا شو.
على عدل منو عدل
ولا على فن منو فن
ولا على مجتمع غرقان بالنصب والاحتيال والرشاوي والفساد
ولا على مدارس عم بتخرج مجموعة اميين بس لانو فلان بيعرف
فلان
كيف بدك ياني إإسف على بلد الظالم في صار مظلوم
والناس غير الناس
والأمل متل اليأس
والجوع عادة والفقر ميزة والكذب فضيلة
نحنا مجموعة ناس فقدت ايمانا بحالا
وبدك ياها تآمن بالوطن وبالأخلاق وبالقانون
الجد: وبكره
سلمى: أمل ناطر حكم الإعدام
ثائر: بكره؟ يا ريت الزمن يا جدي بيرجع رجوع يمكنلك
منرجع الي راح
الجد: رح ترجعو؟ أنا واثق انكون رح ترجعو
سلمى: يمكن تنندفن بس يا ريت نلاقي قبور تساعنا
الجد: رح تتركني يا ثائر
ثائر: كيف فيني كون غريب ببلدي وما فل؟
الجد: وصدى الغريب؟
سلمى: حكاية الأجيال الي جايي عن ناس فلو تيضلو
ثائر: بخاطرك يا جدي.
الجد: كلمة أخيرة.
ثائر: بأمرك يا جدي
الجد: ما تلوموا الوطن يا ولادي ما تلومو الوطن
اذكروا بالخير وادعوا الله يهدي ناسو يمكن بترجعو بيوم
وبتمسحو هالدمعة من عيونو
سلمى: أحلام
ثائر: أحلام ثائر
الجد: حتى الحلم صار ممنوع، الله يكون معكن يا ولادي،
الله يكون معكن.
_تمت_
للتواصل مع الكاتب باسل بديع الزين عبر صفحته على الفايسبوك:
https://www.facebook.com/bassel.b.elzein
