باسل الزّين
إشراف
ومراجعة
الأستاذ
نجيب نعيمة
“مهداة
إلى روح جبران”
الفصل الأول
المشهد الأول
المكان: منزل الطبيب ملحم العابر
الزّمان: أيامنا الحاضرة
(تنفتح الستارة على مشهد الطبيب يجلس في غرفة الجلوس،
يرتدي بدلته الرسمية ويُطالع كتابًا طبيًّا، تدخل الأم وهي امرأة أربعينية تبدو
عليها علامات التواضع والحزن في آن معًا)
ملحم: بكيير، خليكِ نايمة للضهر
الأم: بعدا الساعة 9 واليوم أحد وبتعرفني كل أيام
الأسبوع بشتغل من الفجر للنجر
ملحم: إذا عندك صانعة وعم بتحكي هالحكي شو خليتِ لغيرك
من النسوان، الله يرحم امي كانت قايمة لوحدا بالبيت، خلفت تسع شباب وربتون وما
قصرت، وكانت تشتغل خياطة بنفس الوقت
الأم: الله يرحما
ملحم: عم بتمسخري
الأم: يا عمي شو حكيت
ملحم: مش ضروري تحكي بعرف حركاتك، المهم فيقتِ المحروس
ابنك او بعد
الأم: اليوم عطلتو شو صاير عليه يفيق من الصبح
ملحم: أستغفر الله العظيم ما حدا نازعو غيرك، شو يعني
شاب بصف البكالوريا بعدو نايم؟ معناها ما عم يدرس معناها ما عم بيتابع معناها عم
بيطق حنك، ابنك لازم يكون متل بيو طبيب ناجح واسم لامع يا خوفي يضيع كل الي بنيتو
الأم: رح فيقو رح فيقو بس تركني من هالسيرة
(تخرج الأم ويبقى الأب وحيدًا)
ملحم: ما حدا رح يجبلي أجلي إلا هالصبي، بيو أهم طبيب
قلب بلبنان وحضرتو بدو يدرس قانون تيدافع عن حقوق المظلومين مدارس آخر زمان قاعدين
يحشولون براسون حكي فاضي
(دخول صلاح)
صلاح: صباح الخير
الأب: فقت يا تقبر امك، خليك نايم للضهر مش أحسن
صلاح: يا بيي هيدا اليوم الوحيد الي بنام في وبرتاح، ست
أيام درس ومدرسة
الأب: ترتاح؟ جديدة هيدي، حبيبي الي بعمرك لازم يوصل
الليل بالنهار، خدني مثل أعلى بفيق قبلك وبنام بعدك
صلاح: الله يخليك فوق راسنا
الأب: من الآخر وبلا لف ودوران بشرني بعلاماتك الي بتفتح
النفس
صلاح: بعد بكير للامتحان الفصلي
الأب: قلتلك بلا لف ودوران
صلاح: علامات شهرية ما كتير مهمة
الأب: الله يستر خبرني بق البحصة
صلاح: 16 من عشرين أدب عربي و17 من عشرين أدب انكليزي
الأب: بلا أدب بلا وجع قلب شاطر تاخد علامات بالحكي
الفاضي خبرني بيولوجيا قدي جبت وكيميا ورياضيات
صلاح: بيولوجيا 13 من عشرين
الأب: الله لا يوفقك لا دنيا ولا آخرة 13 ابن ملحم
العابر يجيب 13 ، انت بدك تصير طبيب اذا شغلوك سيرانغ (إبرة) بيكون حظك من السما
صلاح: بيي بتعرف انو ما بدي اعمل طبيب بدي اعمل محامي
الأب: بدك تعمل حكيم وإجرك فوق رقبتك ليك مين اليوم
وطالع بتتروق بيولوجيا وبتتغدا كيميا وبتتعشى رياضيات شو سمعت
صلاح: بس
الأب: كلمة وحدي بشحطك من البيت واصطفل دبر راسك، خلي
الحقوق تنفعك روح من وجي
(دخول الأم)
الأم: يا أبو صلاح تروك الولد يختار
الأب: كلمة وحدي بهالموضوع بضبي غراضك وعبيت أهلك هيدا
الي كان بعد ناقص قال شو صلاح المحامي خدلك هالحكي
الأم: طول بالك بكره الله بيفرجا
صلاح: يكون بعلمكون اذا ضعت بيي رح يكون السبب
الأم: شو اضيع ما تخوفني عليك، صلاح شو في؟ حكيك ما
بيطمن
صلاح: ما شي يا أمي بس فشة خلق
الأم: أكيد
صلاح: ان شاء الله، أنا رايح ادرس عند نادر بدك شي؟
الأم: الله يكون معك، ما تتأخر وتعلقني بلسان بيك
صلاح: ما حدا وصلك لهون إلا ضعفك وسكوتك
الأم: يا ابني ما تجرحني اكتر ما أنا مجروحة، 18 سنة ما
قدراني افتح تمي بكلمة، مين بيقدر يوقف بوج ظلم بيك
صلاح: أنا
الأم: دخيلك لأ، هيدا بيك وانا بعرفو اكتر منك والله
بيزعبك
صلاح: يزعبني، هيك هيك انا ضايع
الأم: صلاح ما تخوفني عليك، هيدا بيك وبدو مصلحتك
صلاح: هيدي مصلحتو بدو مين يكمل المسيرة بعدو شو ذنبي
ادرس اختصاص ما بحبو
الأم: بس تدرسو بتحبو
صلاح: لو وقفتِ مرة بحياتك بوج بيي ما كنا وصلنا لهون
بخاطرك
الأم: صلاح صلاح
المشهد الثاني:
(منزل ربيع الضبع)
(تنفتح السّتارة على مشهد نادر الضبع ابن ربيع الضبع رجل
الأعمال الشهير وهو غارق في تدخين النرجيلة)
نادر: أبو الرور، مش انت بيي وحبيب قلبي
ربيع: انت حبيب قلبي ونور عيوني
نادر: معقول يكون بيي ربيع الضبع صاحب شركات الضبع
للتجارة والخدمات وتاني أغنى رجل بلبنان وما تجبلي فراري
ربيع: من عيوني بس تخلص قصة دفتر السواقة، ما تنسى بعدك
تحت ال 18 وحبايبنا بالداخلية عم بيزبطو الوضع
نادر: طيب أبو الرور وين صار اليخت الي وعدتني في؟
ربيع: خلص مدرسة من هون وبتلاقي اليخت جاهز من هون
نادر: ما تذكرني بالمدرسة دخيل عرضك
ربيع: تقبر قلبي المهم ما تسم بدنك في حدا زعلك عن جديد
نادر: الأساتذة عملوا اعتصام ضدي قال شو أنا صاير ما
بنحمل
ربيع: عم بتزعلون حبيبي نادر؟ معقول تقبرني؟
نادر: ليك هالحكي بشرفك أبو الرور بشرفك سماع
استاذ الأدب العربي حطلي صفر لأني حكيت عن هيدا أبو
الطيب إنو كبراني الخسة براسو
وأستاذ الرياضيات معقدا كتير فنكشن وبنكشن
لأ وخود التقيلة قال شو أستاذ الفيزيا انا صاير مسخرجي
دخلك شو خصني اذا التفاحة وقعت نزول أو طلعت طلوع
ربيع: ما تعتل هم بكره بجبلك اساتذة برايفت واكتر شي
بتعيد السنة المهم ما تسم بدنك
نادر: طفو الفحمات، لنولع غيرن
ربيع: ابن نادر الضبع يولع فحم؟ انت ما بتتحرك كل شي
بيجي لعندك
نادر: كبير يا أبو الرور… حب أنا محتاج قرشين زبط وضعي
ربيع: مع مين يا ملعون
نادر: في تلميذة معي بالصف مكبري راس عم بفكر جبلا شي عقد
الماس بركي بتحلحلا شوي
ربيع: بكره بيكون عندك وفوقو الفين دولار لزوم مصاريف
الضهرات والمجوات
نادر: حب يا أبو الرور
(سماع طرق على الباب)
دخول صلاح
صلاح: صباح الخير عمي ربيع
ربيع: صباح النور
نادر: خيي أبو الصلح عسكر حدي
ربيع: ي الله بخاطركن بشوفك بليل
نادر: أنا ضاهر أسهر ومطول تأرجع
ربيع: خود راحتك تقبرني يلا بخاطركن
نادر وصلاح: الله معك
نادر: كيفو الشريك
صلاح: مأزمي يا خيي نادر مأزمي
نادر: خير
صلاح: نفس الموضوع بيي مصر أعمل حكيم
نادر: شيلني من هالسيرة نحنا ضاهرين نسهر وننبسط
صلاح: ماشي خيي ماشي
المشهد الثالث
(مقهى جيل الغد)
(نادر يُدخن الحشيش)
نادر: يا مان خدلك سيجارة وروق راسك
صلاح: خايف اتعود عليا يا نادر
نادر: تعود، ليه في أحلى منا؟ عالم غير عالم … بتطير
يا صلاح وبتنسى كل شي حولك
صلاح: طيب أنا محتاج انسى انت ليه عم تشربا
نادر: ليك خيي ما في أحلى من انك تنسطل وساعتها خود عضحك
بتصير تشوف الدني ألوان وبطير
صلاح: شكلك بدك تنسى أحلام
نادر: نحنا شو خصنا بالأحلام ها ها ها
بدي اكسرلا راسا بس
صلاح: ما جربت تحب خيي نادر
نادر: حدا بيجيب الدب عكرمو؟ بالمصاري بشتري كل المشاعر
وما في وحدي بتوقف بوجك
تركني من هالسيرة وشد
صلاح: ما بدي، سايرتك مرة بس مش كل مرة
نادر: قوم فل
صلاح: شو؟
نادر: جايي روق راسي وانسطل بدك أهلا وسهلا ما بدك تركني
انسطل لوحدي
صلاح: يعني ما بتعود عليا؟
نادر: ولك شدددددد
صلاح: (بتردد يتناول السيجارة ويلتهمها) أووووففففففف
مساء الخير
نادر: مساء الفل يا عسل
صلاح: بيي بدو ياني أعمل حكيم، وقال شو إذا ما نجحت بدو
يشحطني من البيت
نادر: يشحطك ليه بيك قلم رصاص ها ها ها
صلاح: لأ قلم ستيلو
نادر: ما بعرف هيك ستيلو أنا ها ها ها
صلاح: نزلنا تنين لذيذة يا ماتر
نادر: لذيذة أو لزوزو
صلاح: هاهاها، شد يا معلم
نادر: ليك شو كنت بدي قول
صلاح: نسيت ها ها ها
نادر: تضربلك كاس معي
صلاح: أنا ما بحب أضرب حدا ها ها ها
نادر: شكلنا فصلنا
صلاح: ليه شو نحنا ديجونتير كهربا ها هاها
نادر: خلينا نفل أحسن ما يشحطونا
صلاح: بس يجي الاوتوبيس
نادر: ليه بيمرق بالقهوة
صلاح: لأ بالشاي ها هاها
المشهد الرابع
(منزل الطبيب)
الطبيب: راجع وج الضو وكمان سكران ( يلطمه على وجهه)
صلاح: ايدك ناعمة papa
الطبيب: ابني أنا سكران؟ أربعين سنة العالم كلها بتحلف
بحياتي تيجي ولد متلك يخرب كل شي عملتو، ضهار برا ضهار برات بيتي انت لا ابني ولا
بعرفك
(دخول الأم)
الأم: دخيلك يا أبو صلاح روق شوي شو في
الطبيب: ابنك راجع وج الضو وسكران
الأم: معقول؟
الطبيب: ايه معقول هيدا آخر دلعك، عم قلك ضهار من بيتي
لا ابني ولا بعرفك
الأم: دخيلك يا أبو صلاح تركوا ينام وبكره لكل حادث حديث
الطبيب: يضهر برات بيتي لا ابني ولا بعرفو وإذا بتفتحي
تمك بكلمة بضبي غراضك وعبيت أهلك، برا عم قلك برا
(يلتفت صلاح تجاه والدته الغارقة في الدموع ويرحل)
المشهد الخامس
(منزل أبو نادر)
نادر: البيت بيتك أبو الصلح
بيي يا بيي
الأب: عيونو
نادر: صلاح بدو يقعد عنا كم يوم أو كم أسبوع
الأب: أهلا وسهلا
نادر: بدنا نزبطو
الأب: كيف يعني؟
نادر: يعني رشلك كم ألف دولار تياب وتخت جديد ومصاريف
وهالحكي
الأب: من عيوني هيدا شك ب ب ب 10 آلاف منيح؟
نادر: بيمشو الحال
الأب: أنا مضطر روح عندي شغل كتيير
نادر: حبيبي أبو الرور
صلاح: مين قلك بدي مصاري
نادر: ومين قلك المصاري لحضرتك؟
صلاح: لكن لشو؟
نادر: سماع منيح الحشيش الي عم نشربو صاير مضروب في إبر
نازلي جديد مفعولا أكبر وسحرا بيطوش
صلاح: مخدرات يا نادر
نادر: وطي صوتك يا قفل، أنا بعت عقد الاماس الي عأساس
اشتريتو لأحلام وجبت مجموعة إبر لأكتر من 3 أشهر، وهالعشر آلاف لزوم الحبوب
صلاح: سمحلي أنا برفض كون معك
نادر: أنت حر بس مش مسموح تكون عليي
صلاح: ما فهمت
نادر: يعني اذا اضريت رح اسحب مصاري من بيي عاسمك
صلاح: اكيد لأ
نادر: لكن هوينا وارجيني عرض كتافك
صلاح: عم بتطردني يا نادر
نادر: بتعرف انو البيت بيتك بس كمان ما بيصير تعيش آكل
شارب نايم عندي وما تزبطلي أموري
صلاح: يعني عم بتمسكني من إيدي الي بتوجعني
نادر: ما تخدا هيك، الدني اخد وعطا
صلاح: واذا رفضت
نادر: انت حر
صلاح: (مُطرقًا) شو بيضمنلي ما تجرني معك بالمخدرات متل
ما جريتني معك بالحشيش
نادر: ما حدا بيغصب حدا، وبوعدك إذا ما بدك ما بقرب صوبك
صلاح: وعد؟
نادر: شو شايفني رح خليك تحبحب بالقوة؟
صلاح: ماشي
نادر: خيي أبو الصلح
المشهد السادس
(مخفر العاصمة)
(دركي يخاطب قائد الدرك)
الدركي: وصلتنا معلومات أكيدة انو نادر ابن ربيع الضبع
عم بيشتري ويروج مخدرات، واليوم الساعة 11 بليل رح يستلم دفعة جديدة من الحبوب
والأبر
قائد الدرك: لازم نقبض عليه متلبس والخطة الي رح ارسما
ممنوع الغلط فيا شو سمعت؟
الدركي: بأمرك، أنا رح بلغ الوحدة المختصة تجتمع فيك وما
بتكون إلا راضي
قائد الدرك: الي دابحني انو كل يوم عم نقبض عمجموعة
حشاشين ومدمنين أعمارون ما بتتجاوز ال 17 سنة، مأساة والله مأساة، الله يستر من
الأعظم، بدل من حط أملنا بالجيل الجديد صارت حبوسنا مليانة شباب عاطل عن الأمل
ومأجر عقلو ودماغو يا لطيف الطف
المشهد السابع
(مخفر الدرك)
قائد الفصيلة: ابن أهم رجل أعمال وابن أهم طبيب بلبنان
متورطين بقضايا مُخدرات؟ شو ناقصكون بدي اعرف شو ناقصكون؟ احكوا؟
دركيّ: سيدنا الدكتور ملحم والأستاذ ربيع الضبع طالبين
يشوفوك
قائد الفصيلة: قلون يتفضلوا… وطيتو راس أهلكن
(يدخل والد صلاح ويهجم على ابنه مباشرة في حين تبدو
اللهفة على والد نادر)
أبو صلاح: حشاش يا بلا تربية آخرتك الحبس يا فاشل
قائد الفصيلة: إذا بتريد لو سمحت تمالك أعصابك شوي
أبو نادر: تقبر قلبي صرلك شي يا عمري
قائد: هلأ هيدا الي طلع معك
تفضلوا
شو يا صلاح احكي بيك حارمك من شي، ناقصك شي، لي وطيت
راسو؟ احكي جاوب
صلاح: ناقصني بي، ناقصني شوف بعيونو حنان ومحبة اكتر ما
شوف سلطة وجبروت، كل شي ممنوع، الحب ممنوع السهر ممنوع المطالعة ممنوعة المهم صير
حكيم كمل المسيرة من بعدو، كان ناقصني شوية كرامة يا بيي تحس اني ابنك مش مشروع عم
بستثمرو …
أبو صلاح: والك عين تحكي يا واطي
قائد الفصيلة: اذا بتريد تمالك أعصابك، وانت يا صلاح
هيدا مش مبرر تتكون حشاش
صلاح: وقت الي بتضبك الطرقات لا عيلة ولا بيت بيصير
العقل يتعب حضرة القاضي بيصير العقل يتعب
القائد: وأنت يا نادر أفندي كمان كان ناقصك حنان البي؟
نادر: كان ناقصني قسوة البي. بعمرو ما قلي عشي لأ،
شايفني الدنيا وكل شي فيا، مصاري قد ما بدي، وسهر وسيارات ويخت واحدث تلفون، بعمرو
ما سألني درست نجحت بعمرو ما حرمني تحس اني بني آدم لازم احترم حالي واتكل عنفسي،
كل شي بيمشي متل ما بدي المهم ما ينزعج خاطري كتر الحنان بيضيع يا بيي كتر الحنان
بيضيع
القائد: كمان هيدا مش مبرّر تتكون مدمن وحشاش
نادر: وقت الي ما يكون بحياتك شي تكون مسؤول عنو كون
اكيد حضرة القاضي انو العقل ما بيعود الو لزوم.
القائد: عكل حال ما فيني الا اعرضكن بكره عالنيابة
العامة، يمكن سلطة القانون بتعلمك تتحمل مسؤولية يا نادر وبتعلمك القسوة العادلة
يا صلاح، وبتعوض حنان مفرط وقسوة زايدة.
الراوي: مرت سنوات وسنوات تبوّأ بعدها نادر إدارة شركات
أبيه، في حين انصرف صلاح إلى تألقه كمحام في الاسئناف.
باسل
بديع الزّين
للتواصل مع الكاتب عبر الفايسبوك: https://www.facebook.com/bassel.b.elzein
